Tofauti Kati ya Kiwanja Kilichopimwa (Surveyed Plot) na Kiwanja ambacho hakijapimwa (Unsurveyed Plot)

Kuwa na taarifa sahihi za ujenzi kabla na wakati wa ujenzi ni jambo la muhimu sana katika zama hizi kwa yeyote yule anayefikiria kujishughulisha na shughuli za ujenzi. Tumekuwa tukiona watu mbalimbali wakiingia kwenye matatizo ya kubomolewa nyumba zao na wengine wakipoteza ardhi wanazomiliki au kuingia kwenye migogoro isiyoisha kutokana na kukosa taarifa na maarifa sahihi kabla ya kufanya ujenzi.

Rafiki yangu mpendwa, kama unafikiria kufanya shughuli yeyote ya ujenzi; Moja ya vitu muhimu kabisa vya kuzingatia kabla hujaanza ujenzi ni kujua kama eneo unalotaka kujenga limepimwa au halijapimwa. Na hapa ndipo tunaenda kujadili kwa kina ambapo tutaangalia mambo matatu muhimu;

1. Tofauti kati ya Kiwanja kilichopimwa (Surveyed Plot) na ambacho hakijapimwa (Unsurveyed plot)
2. Faida ya Kufanya ujenzi kwenye kiwanja Kilichopimwa 
3. Hasara za kufanya ujenzi kwenye kiwanja ambacho hakijapimwa

*Tuanze moja kwa moja na tofauti baina ya kiwanja kilichopimwa na ambacho hakijapimwa.*

Kiwanja kilichopimwa ni kile ambacho kina hati na kinaonyesha mmiliki halali wa eneo hilo iwe ni kwa mauziano, kwa kurithi au hata kwa kupewa zawadi. Eneo hili linakuwa limeonyeshwa kwenye ramani ya mipango miji ambapo inakuwa imeonywesha ukubwa wa eneo kwa vipimo halisi pamoja na matumizi sahihi ya eneo husika kulingana na mahitaji ya mipango miji. Utalitambua eneo hili kwa kuangalia alama za mawe yaliyowekwa kwenye kona za kiwanja.

Kwa upande wa pili, kiwanja kisichopimwa ni kile ambacho hakina hati. Mara nyingi haya ni maeneo ambayo yanakuwa nje ya miji na yanakuwa chini ya usimamizi wa halmashauri za vijiji. Maeneo haya yanakuwa hayana ramani rasmi ya mipango miji na hivyo huwa hakuna mpangilio rasmi wa matumizi ya maeneo haya.

*Pili tuangalie faida za kufanya ujenzi kwenye eneo lililopimwa*

Baada ya kuona tofauti ya kiwanja kilichopimwa na ambacho hakijapimwa, zifuatazo ni faida chache kati ya nyingi utakazozipata kwa kujenga kwenye kiwanja kilichopimwa

• Matumizi ya eneo yanakuwa yameainishwa waziwazi kwa mfano kama ni eneo la makazi, eneo la viwanda, eneo la kanisa/msikiti au eneo la biashara. kwa namna hii ni rahisi kujenga nyumba inayoendana na matumizi ya eneo

• Maeneo yaliyopimwa kunakuwa na huduma zote za kijamii kuanzia kwenye barabara, maji, maduka, maeneo ya wazi n.k

• Kutambulika rasmi na serikali kwa uwepo wako kwenye eneo husika na hivyo kuepuka migogoro na changamoto zisizo za lazima.

SOMA HAPA: Chanzo cha nyufa kwenye nyumba na namna bora ya kuzitibu 

*Tatu tuangalie hasara za kufanya ujenzi kwenye eneo ambalo halijapimwa..**

Unapojenga kwenye eneo ambalo halijapimwa unakuwa umejiweka kwenye hatari zifuatazo

• Kutokuwa na uhakika wa matumizi ya eneo husika hali ambayo inaweza kusababisha ujikute unajenga nyumba ya makazi kwenye eneo la viwanda

•  Uwezekano wa kupoteza nyumba yako pale ramani ya mipango miji itakapotoka na kuonyesha kwamba sehemu uliyojenga inahitajika itumike kwa matumizi mengine.

• Usumbufu mkubwa wa kuhamishwa kwenye eneo lako na kupewa sehemu nyingine au kulipwa fidia ya kuondoka kwenye eneo lako

Ndugu msomaji hayo ni mambo machache kati ya mengi ambayo unapaswa kuyajua linapokuja swala la kiwanja kilichopimwa au ambacho hakijapimwa. Kabla hujaanza ujenzi wako ni vyema ukajiridhisha kwa 100% kwamba unajenga sehemu sahihi ambapo hutategemea kupata usumbufu labda itokee majanga ya asili.

*Ushauri wangu kwako*

Kwa wale wenye maeneo ambayo hayajapimwa ni vyema wakachukua hatua stahiki za kwenda manispaa kuomba ramani ya mipango miji ili waweze kujua kuhusu mpangilio wa maeneo yao. Endapo itatokea manispaa hakuna ramani ya mipango miji basi inabidi waombe kupimiwa maeneo hayo kabla hawajaanza kuyaendeleza na hata kama wameshayaendeleza basi waombe ufanyike urasimishaji wa maeneo hayo ili waweze kutambulika rasmi kama wamiliki halali. Kwa kuwa gharama za upimaji zinaweza kuwa juu kama ukiwa peke yako,, basi nashauri pia watu wenye maeneo yaliyo karibu karibu na hayajipwa wajikusanye pamoja na kwenda kuomba upimaji ili kupunguza gharama hizo.

Mbali na hayo niliyokueleza hapo juu kumbuka pia kuwasiliana na mshauri / mtaalamu wako wa ujenzi ili aweze kukushauri na kukusaidia katika kufuatilia baadhi ya vitu muhimu kabla ya kuanza ujenzi wako.

Muhimu zaidi tuhakikishe tunajenga katika maeneo yaliyoainishwa vizuri ili kuepuka usumbufu kwa siku za mbeleni. Pia kwenye kununua ardhi tukumbuke kuna matapeli ambao wanaweza kukuingiza hasara mara mbili. 

Nikutakie kila la kheri katika kuhakikisha unakuwa na nyumba bora ya kuishi iliyojengwa katika sehemu bora kabisa.

Rafiki yako mpendwa katika ujenzi wa taifa bora

Eng Beatus B. Laswai

www.nyumbayakomaishayako.co.tz

Mobile : 0752 655 084

Email:engbeatus.laswai@gmail.com

Read More

Hatua Tatu Muhimu – Ujenzi wa Msingi Imara

Habari ya leo rafiki yangu na mfatiliaji wa blogu hii ya nyumba yako maisha yako. Leo ni siku nyingine ya kipekee kabisa ambapo tunaenda kufanya yaliyo bora na kutegemea kupata matokeo bora kabisa. Mimi kama mwalimu wako wa ujenzi naendelea kukuletea Makala bora kabisa ili ujifunze na kuhakikisha unafanikisha ndoto yako ya kuwa na nyumba bora kabisa.

Leo rafiki yangu tujifunze hatua tatu muhimu kwenye ujenzi wa msingi. Kama ambavyo tuliona kwenye moja ya Makala zilizopita, msingi ni sehemu muhimu kuliko zote kwenye ujenzi wa nyumba. Kama hukuisoma Makala hiyo isome hapa.

Ujenzi wa msingi unahitaji umakini wa kipekee ili kuhakikisha unakuwa na nyumba bora kabisa. Zifuatazo ni hatua tatu muhimu za kuzingatia katika ujenzi wa msingi;

Hatua Ya Kwanza: Isome na Kuielewa Vizuri Michoro ya Nyumba

Moja ya changamoto kubwa niliyokutana nayo kwa mafundi wengi ni kukosea vipimo vya michoro. Wengi wanafanya ujenzi kwa mazoea bila kutumia utaalamu na kwa kuwa wenye nyumba wengi hawana utaalamu wa mambo ya ujenzi inakuwa ni ngumu kugundua tatizo hili. Unapokosea kipimo cha msingi unabadili kabisa muonekano wa nyumba yako kwani msingi unaathiri sehemu ya juu ya nyumba. Kuna watu ukioanisha kilichopo kwenye ramani na kilichojengwa unakuta kuna tofauti kubwa sana.

Kabla hujaanza ujenzi isome michoro yako vizuri na hakikisha umeielewa. Ikiwezekana mtafute mtaalamu wa ujenzi ili aweze kumsimamia fundi na kuhakikisha anafanya kile kilichopo kwenye michoro. Mwombe akueleweshe na wewe ili ujue namna msingi wako utakavyokaa, nyumba yako ni ya thamani sana usikubali ijengwe kiholela.

Hatua Ya Pili: Chimba Msingi Mpaka Kwenye Kina Kinachokubalika

Msingi imara lazima ujengwe juu ya ardhi ngumu (mwamba). Sehemu ya juu ya ardhi huwa ni laini (dhaifu) na haifai kwa ajili ya kubeba msingi na nyumba yako kwa ujumla, hivyo ili kuwa na msingi imara huna budi kuchimba mpaka kwenye kina cha ardhi ngumu. Umbali kutoka juu ya ardhi mpaka ulipo mwamba unatofautiana baina ya sehemu na sehemu; usije ukaona rafiki yako kwenye eneo lake amechimba kidogo akaweka msingi na wewe ukaiga wakati eneo lako lipo sehemu tofauti.

Epuka kabisa mazoea kwenye ujenzi wa nyumba, kuna wakati eneo linaweza kuwa moja lakini lina sifa tofauti za udongo. Unaweza kuta pia eneo lako liliwahi kutumika kama sehemu ya kutupa takataka kipindi cha nyuma, unapojenga eneo hili utatumia mbinu tofauti kabisa na yule anayejenga eneo la kawaida. Unapochimba ni vizuri mtaalamu wa ujenzi akawepo ili aweze kukupa ushauri wa kitaalamu. Kuna wakati mwamba mgumu unaweza ukawa uko mbali sana na hivyo badala ya kuendelea kuchimba tunafanya maboresho kwenye udongo (soil improvement) ili kuupa udongo nguvu ya kubeba mzigo kutoka juu.

Hatua Ya Tatu: Tumia Malighafi Zenye Ubora

Moja ya changamoto kubwa kwenye ujenzi wa nyumba ni watu kupenda kutumia malighafi za bei nafuu ili kukwepa gharama. Hili limewafanya wengi kuingia kwenye gharama kubwa za matengenezo (au hata kubomoa sehemu iliyojengwa) kutokana na ujenzi kutokidhi viwango vya ubora.

Endapo unataka uwe na msingi imara na utakaodumu kwa muda mrefu ni lazima utumie malighafi zenye ubora wa hali ya juu. Kama msingi wako unajengwa kwa mawe basi tumia jiwe gumu kabisa, kama unajenga kwa matofali ya bloku basi tumia tofali zilizotengenezwa vizuri, kama unahitaji udongo kurudishia kwenye eneo la msingi hakikisha hautumii udongo wenye tope au mfinyanzi bali tumia mchanga wa mtoni au kifusi kilichokaguliwa na kukubalika.

Hata kama uwe na fundi mzuri kiasi gani, kama utatumia malighafi za kiwango cha chini basi tegemea kupata nyumba mbovu. Ni bora ujenge nyumba yako taratibu lakini kwa kiwango kinachokubalika kuliko kujenga haraka haraka halafu baada ya muda unaanza kuhangaika.

Mpaka hapo rafiki yangu naamini utakuwa umepata uelewa wa namna ya kuhakikisha unapata msingi imara wa nyumba yako utakaodumu miaka na miaka. Jambo la msingi ni kuhakikisha unapata mtaalamu wa ujenzi atakayekushauri namna bora ya kujenga msingi wa nyumba yako. Hata kama una fedha kidogo usiogope, sio kila ujenzi wa nyumba unahitaji gharama kubwa.

Ni mimi rafiki yako na mhamasishaji wa maswala ya ujenzi;

Eng Beatus B. Laswai

Mobile: 0752 655 084 (WhatsApp)

Email: engbeatus.laswai@gmail.com

Blog: http://nyumbayakomaishayako.blogspot.com

Read More

Msingi Imara, Nyumba Imara

Moja ya maamuzi mabovu kabisa ambayo hutakiwi kuyafanya linapokuja swala la ujenzi wa nyumba yako ni kutokujenga msingi imara. Ngoja nikupe mfano rafiki; Mmoja wa marafiki zangu wakati nasimamia ujenzi wa nyumba yake maeneo ya Iringa; majirani zake walikuwa wanamwambia tunatumia gharama kubwa sana kwenye msingi kama vile tunajenga ghorofa mpaka ikafika wakati akawa anahisi kama vile anapoteza pesa ya bure. Miezi kadhaa baada ya nyumba yake kukamilika ndipo alipoona umuhimu wa kile tulichokifanya  kwani ilikuwa kipindi cha mvua na nyumba za majirani zake karibu zote zilionyesha mipasuko (cracks). Walichosahau majirani zake ni kwamba eneo lile lina udongo wa mfinyanzi ingawa ulikuwa kwa kiasi kidogo na hivyo ilitakiwa waweke msingi imara kabisa.

Leo rafiki yangu napenda kukushirikisha umuhimu wa kuwa na msingi imara. Utaweza kufahamu msingi imara ni upi na ni kwa namna gani utahakikisha unakuwa na msingi imara kabisa ili ujihakikishie ujenzi wa nyumba bora.

*Msingi Imara* kwa ufupi ni ule ambao unaweza kuhimili uzito wa jengo pamoja na nguvu kutoka nje kama vile upepo, msukumo wa udongo, mitikisiko pamoja na nguvu nyingine za asili. Msingi huu unaweza ukajengwa kwa kutumia mawe, matofali ya block, Zege au malighafi nyingine ambazo zinakubalika kwenye ujenzi. Unapokuwa na msingi imara unajihakikishia usalama wako, mali zako na wote watakaoishi ndani ya nyumba yako na pia utaweza kujikinga kwa namna Fulani na majanga ya asili kama vile matetemeko na mitikisiko ya ardhi.

SOMA HAPA: Hatua Tatu Muhimu Ujenzi wa Msingi Imara

*Namna ya kuhakikisha unajenga msingi imara*

Ili kuweza kujenga msingi imara na utakaosaidia kuimarisha jengo lako zingatia mambo yafuatayo;

i.                 Fanya utafiti wa eneo lako hasa katika kutambua aina ya udongo

Hapa unaweza ukafanya hata utafiti wa macho tu na kwa kushirikiana na mtaalamu wako wa ujenzi ukaweza kufanya maamuzi ya msingi utakaohitajika. Wakati mwingine udongo wa juu ya ardhi unaweza ukawa tofauti na ule uliopo ndani ya ardhi baada ya kuchimba mita kadhaa na endapo utakutana na hali hii basi msingi wako itabidi ubadilike kulingana na aina ya udongo uliyokutana nayo. Cha kuzingatia hapa ni kuhakikisha msingi wako unakaa juu ya sehemu ngumu na imara ili kuepuka kutitia.

ii.               Tambua kama eneo lako lina maji maji au ni eneo kavu

Msingi unaojengwa sehemu zenye majimaji ni tofauti kabisa na msingi utakaojengwa sehemu kavu. Kwa eneo ambalo lina maji muda mrefu msingi wake utahitaji material (mali ghafi) zinazoweza kuhimili uwepo wa maji kama vile zege. Ukijenga msingi wa matofali ya kawaida kwenye eneo hili unajiweka kwenye hatari kubwa sana

iii.             Jua matumizi sahihi ya Jengo lako

Kwa kutambua matumizi sahihi ya jengo lako kunasaidia sana katika kutambua uzito sahihi utakaohitajika kubebwa na msingi wako. Msingi wa nyumba ya kuishi ni tofauti sana na msingi wa ghala hivyo usijenge nyumba ya kuishi hafu baada ya muda unaibadilisha na kuwa ghala utaleta matatizo kwenye msingi.

Ninachotaka kukukumbusha rafiki yangu leo ni kwamba msingi ndio sehemu ya kwanza muhimu kwenye jengo lako na kamwe hutakiwi kufanya makosa kwenye eneo hili.

Kitu kingine ambacho ningependa kusisitiza ni kwamba USIJENGE KWA MAZOEA. Epuka kabisa maneno ya mtaani eti mbona Fulani amejenga hivi au vile na wewe ukayapokea yalivyo. Itakapotokea tatizo itakuwa ni wewe na wale watakaokuwa wanaishi ndani ya nyumba hiyo.

Jenga msingi imara uwe na nyumba bora maisha yako yote.

SOMA PIA; UTARATIBU WA KUPATA KIBALI CHA UJENZI

Ni mimi rafiki yako na mhamasishaji wa maswala ya ujenzi;

Eng Beatus B. Laswai

Mobile : 0752 655 084 (WhatsApp)

Email : engbeatus.laswai@gmail.com

Blog: http://nyumbayakomaishayako.blogspot.com

Read More

Zifahamu Sababu Muhimu Za Kuweka Uzio Kwenye Eneo La Ujenzi

Habari ya leo rafiki yangu na mfatiliaji wa makala hizi bora kabisa za ujenzi. Ni matumaini yangu unaendelea kuchukua hatua muhimu ili kuhakikisha maisha yako na ya wale wanaokuzunguka yanakuwa bora kabisa!

Leo rafiki yangu karibu tujifunze kuhusu umuhimu wa kuweka uzio kwenye eneo la ujenzi. Inawezekana umewahi kupita sehemu yenye ujenzi ukakuta wamezungushia mabati kuzunguka eneo lote la ujenzi na ukawa unajiuliza kwanini wamefanya hivyo? Kuna sababu nzuri tu kwanini eneo la ujenzi huwa linazungushiwa uzio na hapa nakwenda kukueleza kwa kina sababu hizo. Lakini kabla hatujajifunza sababu za uzio huu hebu tuone kwanza, **Uzio wa eneo la Ujenzi (Site Hoarding), unamaanisha nini?**

Maana ya Uzio wa eneo la Ujenzi (Site Hoarding)

Huu ni aina ya uzio unaojengwa kwa matumizi ya muda mfupi (temporary structure) kuzunguka eneo la ujenzi. Ujenzi wa uzio huu ni muhimu sana na ni moja ya matakwa muhimu kutoka kwenye sheria za majenzi zinazotumika sehemu mbalimbali. Uzio huu unaweza kujengwa kwa mabati (Hii ndo mara nyingi inatumika), unaweza kujengwa pia kwa matofali au mabanzi kutegemeana na ukubwa/umuhimu wa project. Uzio huu pia hujengwa kabla ujenzi haujaanza na huondolewa pale ujenzi unapokamilika!

Mfano wa uzio wa mabati uliojengwa kuzunguka eneo la ujenzi.

Kwanini kuweka uzio eneo  la ujenzi??

Zifuatazo ni sababu muhimu za kuweka uzio kwenye eneo la ujenzi;

1.       Sababu ya kwanza na kubwa ni USALAMA (Health & Safety); uzio unahakikisha usalama wa wafanyakazi, wageni wanaokuja site pamoja na wanajamii wanaozunguka eneo la ujenzi. Eneo la ujenzi linaweza kuwa na mashimo, misumari, mizigo mizito… n,k hivyo usipoweka uzio ni rahisi kutokea ajali za hapa na pale na ajali nyingine zinaweza kuwa mbaya kabisa.

2.      Ulinzi na usalama wa mali zilizopo eneo la ujenzi. Kwenye eneo la ujenzi huwa kuna malighafi mbalimbali za kujengea na kama tunavyojua baadhi ya watu huwa sio waaminifu hivyo unapoweka uzio unapunguza uwezekano wa kuibiwa malighafi za ujenzi!

3.       Kuhakikisha watu sahihi tu ndio wanaingia eneo la ujenzi. Unapoweka uzio kunakuwa na geti maalumu la kuingilia na kutokea hivyo ni rahisi kuhakikisha wale wanaohusika na ujenzi tu ndio wanakuwa kwenye eneo la ujenzi.

4.       Kutumia sehemu hii ya uzio kuweka matangazo yanayohusiana na kampuni inayofanya ujenzi wa mradi husika. Kampuni inayofanya ujenzi inaweza kutumia uzio huu kujitangaza na kutafuta wateja zaidi kwa kuonyesha kile wanachofanya na uwezo wao kwa ujumla. Hii ni njia rahisi kabisa ya kujitangaza na kukuza biashara.

Mfano wa uzio wa nyavu za chuma kuzunguka eneo la ujenzi

Rafiki hayo ndio mambo muhimu zaidi linapokuja swala la uzio kwenye eneo la ujenzi. Zipo faida nyingine lakini kwa leo tuishie hapo. Cha msingi unapojenga uzio hakikisha uzio huo uko imara ili usiezuliwe na upepo kirahisi au kuharibiwa na watu kwa haraka. Uzio ni muhimu sana na unasaidia kutunza eneo lako la ujenzi.

Kwa ushauri kuhusu maswala yote yanayohusiana na ujenzi usisite kuwasiliana nami;

Rafiki yako mpendwa

Eng Beatus B. Laswai

http://nyumbayakomaishayako.blogspot.com

Mobile : 0752 655 084

Email : engbeatus.laswai@gmail.com

Read More