Zifahamu Athari za Kufanya Ujenzi Kwenye Eneo Lenye Udongo wa Mfinyanzi Na Jinsi ya Kuepuka Athari Hizo Wakati wa Ujenzi

Habari ya leo rafiki yangu mpendwa na mfatiliaji wa blogu hii ya “Nyumba yako, Maisha yako”. Hongera sana kwa siku hii nyingine tulivu kabisa ambapo tunaenda kufanya yaliyo bora na kutegemea kupata matokeo bora kabisa. 

Leo tuelimishane kidogo kuhusu udongo wa mfinyanzi! Udongo wa mfinyanzi ni upi? Jinsi ya kutambua udongo wa mfinyanzi? Madhara yake kwenye ujenzi….. Na namna bora ya kujenga kwenye udongo wa mfinyanzi!

Unapotaka kufanya ujenzi kitu cha kwanza na cha muhimu ni kutambua aina ya udongo uliopo kwenye eneo lako la ujenzi. Utambuzi huu utakusaidia kujua namna ya kufanya ujenzi wako ili kuepuka changamoto za kufanya marekebisho mengi baada ya ujenzi kukamilika. Kama hujui aina za udongo ni vyema ukawasiliana na mtaalamu wa ujenzi akueleze kwa kina kuhusu aina na tabia za udongo kulingana na mahali ulipo.

Jinsi ya Kutambua Udongo wa Mfinyanzi

Udongo wa mfinyanzi ni udongo wenye tabia ya kusinyaa na kutanuka. Kukiwa na unyevu unyevu udongo huu hutanuka na endapo unyevunyevu utapungua au kukauka udongo huu husinyaa na kuacha nafasi (kupasuka pasuka). Tabia hii husababisha nguvu ya msukumo inayokinzana ambayo itasababisha madhara endapo utafanya ujenzi kwenye udongo huu bila kuzingatia kanuni za ujenzi kwenye eneo la mfinyanzi.

Njia rahisi ya kutambua udongo wa mfinyanzi ni kuangalia alama za mipasuko kwenye ardhi. Mipasuko hii hutokea hasa kipindi cha kiangazi ambapo udongo huu unasinyaa sana kutokana na kutokuwa na unyevunyevu.

*Athari za udongo huu kwenye nyumba yako*

Udongo wa mfinyanzi unaposinyaa unakuwa na hatari zaidi kwenye nyumba yako kuliko unapotanuka. Kama tulivyoona hapo juu udongo huu ukisinyaa unakuwa na mipasuko inayoacha nafasi hali inayosababisha nguvu kubwa ya mvutano kwenye msingi wa nyumba. Hali hii inapotokea nyumba yako itapata nyufa au mipasuko (cracks) kwenye maeneo mbalimbali ikiwemo msingi, kuta, nguzo, sakafu, tiles, beam pamoja na maeneo mengine. Hali hii ya mipasuko huharibu taswira ya jengo na kulifanya liwe hatari kwa matumizi. Jengo lenye shida hii litahitaji marekebisho ya mara kwa mara ili kuziba nyufa na kubadili sehemu zilizoharibika na wakati mwingine inakuwa ngumu kabisa kuishi kwenye nyumba ya namna hii kitu ambacho ni hasara kubwa kwa mmiliki wa jengo.

Mfano wa mpasuko kwenye nyumba kutokana na nguvu kubwa ya mvutano kwenye udongo

*Hatua za Kuchukua Unapotaka Kufanya Ujenzi kwenye Eneo lenye Udongo wa Mfinyanzi*

Kuna njia mbalimali za kufanya ujenzi kwenye mfinyanzi lakini leo nitaongelea njia kuu mbili unazoweza kuzitumia  kupambana na udongo wa aina hii;

1. Kuondoa kabisa udongo wa mfinyanzi eneo utakalojenga msingi 

Mbinu hii inatumika ili kuhakikisha msingi wako haugusani kabisa na udongo wa mfinyanzi. Ukishaondoa udongo wa mfinyanzi unaleta udongo mwingine mpya na kuuweka kwenye eneo husika ambapo utajenga msingi wako. Njia hii inaweza ikaonekana ina gharama kubwa wakati unaanza ujenzi lakini ni njia ya uhakika kuhakikisha hautakutana na changamoto za mipasuko baada ya kumaliza ujenzi. Kwa kutumia mtaalamu wa ujenzi utashauriwa namna ya kutoa udongo uliopo na kuweka mwingine kwa kiasi kinachotakiwa na kwa gharama nafuu.

 2. Kuhakikisha maji hayafikii eneo ulilojenga msingi wako

Ili udongo wa mfinyanzi utanuke na kusinyaa unahitaji maji (unyevunyevu). Unaweza ukajenga nyumba yako bila kuondoa udongo wote wa mfinyanzi (na hapa inashauriwa ujenge kipindi cha kiangazi ambapo udongo unakuwa umesinyaa) halafu ukimaliza ujenzi unaweka miundombinu ambayo utahakikisha maji hayafiki kwenye msingi wa nyumba yako. Njia hiii inaweza ikaonekana rahisi lakini hugeuka kuwa ya gharama kubwa hasa kipindi cha mvua ambapo utatakiwa kuhakikisha maji yote yaliyopo na yanayokuja kwenye eneo lako unayatafutia uelekeo wa tofauti ili yasizuru nyumba yako.

Mpaka kufikia hapo ndugu msomaji naamini umepata picha juu ya ujenzi wa nyumba yako kama eneo lako lina udongo wa mfinyanzi na namna bora ya kupambana na changamoto hiyo. Kwa maelezo na ushauri zaidi usisite kuwasiliana na mtaalamu wako wa ujenzi.

Kumbuka

Sio kila mpasuko au nyufa kwenye nyumba yako umesababishwa na udongo wa mfinyanzi, kwenye ujenzi kuna changamoto nyingi sana hivyo kama hujajenga nyumba yako kwenye udongo wa mfinyanzi na imetokea ina mipasuko basi ni muda muafaka wa kumtafuta mtaalamu wa ujenzi ili akushauri tatizo ni nini na namna bora ya kulitatua.

SOMA ZAIDI: Chanzo cha Nyufa(cracks) kwenye nyumba na namna bora ya kudhibiti mipasuko hii!

Jenga Kitaalamu, Jifunze Mbinu Bora za Ujenzi, Ishi Maisha ya Furaha na Yenye Thamani.

Rafiki yako mpendwa

Eng Beatus B. Laswai

http://nyumbayakomaishayako.blogspot.com

Mobile : 0752 655 084

Email : engbeatus.laswai@gmail.com